தஞ்சாவூர் மாவட்டம் திருவையாறு அடுத்த மணக்கரம்பை செபஸ்தியார் கோவில் தெருவைச் சேர்ந்தவர் ஆனஸ்ட்ராஜ் (21). தஞ்சாவூர் டவுன் கரம்பையைச் சேர்ந்தவர் விஜய் (21). இவர்கள் இருவரும் திருவையாறு அடுத்த கடுவெளியில் உள்ள அரசு தொழிற்பயிற்சி நிறுவனத்தில் இரண்டாம் ஆண்டு எலக்ட்ரீசியன் படித்துவருகின்றனர்.
இந்நிலையில், தேர்வு எழுதிவிட்டு, இருசக்கர வாகனத்தில் வீடு திரும்பிக்கொண்டிருந்தனர். அம்மன்பேட்டை அருகே இவர்கள் சென்றுகொண்டிருக்கையில், தஞ்சாவூரிலிருந்து திருவையாறு நோக்கிவந்த சுமோ எதிர்பாராதவிதமாக இருசக்கர வாகனத்தின் மீது மோதி விபத்துக்குள்ளானது. இதில் ஆனஸ்ட்ராஜ், விஜய் இருவரும் சம்பவ இடத்திலேயே உயிரிழந்தனர்.
இது குறித்து தகவலறிந்த திருவையாறு காவல் துணைக் கண்காணிப்பாளர் சித்திரவேலு, நடுக்காவேரி ஆய்வாளர் (பொறுப்பு) விஜயலெட்சுமி உள்ளிட்ட காவல் துறையினர் சம்பவ இடத்திற்குச் சென்று மாணவர்களின் சடலத்தைக் கைப்பற்றி உடற்கூராய்வுக்காக திருவையாறு அரசு மருத்துவமனைக்கு அனுப்பிவைத்தனர்.
பின் இந்த விபத்து குறித்து வழக்குப்பதிவு செய்த நடுக்காவேரி காவல் துறையினர் விசாரணை மேற்கொண்டுவருகின்றனர்.
